تاجیکستان و روسیه در مبارزه با تروریسم در افغانستان همکاری می‌کنند
تاجیکستان و روسیه همکاری‌های دوجانبه در رابطه با وضعیت افغانستان و مبارزه با تروریسم انجام می‌دهند.
امامعلی رحمان، رئیس جمهور تاجیکستان و سرگئی ناریشکین، رئیس سرویس اطلاعات خارجی روسیه، در مورد افغانستان گفت‌وگو کردند.
منابع خبری تاجیکستان گزارش دادند که امامعلی رحمان با سرگئی ناریشکین، دیدار و در مورد «اهمیت تقویت بیشتر همکاری‌ها در راستای مبارزه مشترک با تروریسم، افراط‌گرایی و جرایم سازمان‌یافته فراملی از جمله قاچاق مواد مخدر و اسلحه، جرایم سایبری و سایر تهدیدات ملی» صحبت کرده‌اند.
در بیانیه ریاست جمهوری تاجیکستان آمده است که در این گفت‌وگو «مشکل افغانستان در مرکز توجه قرار داشت» و طرفین بر گسترش همکاری برای مبارزه مشترک با تروریسم تأکید کرده‌اند.
سرگئی ناریشکین به خبرنگاران گفت: «طیف گسترده‌ای از همکاری‌های دوجانبه بین روسیه و تاجیکستان و همکاری در رابطه با وضعیت افغانستان و پیرامون آن را مورد بحث قرار دادیم.»
در بیانیه همچنین آمد که طرفین درباره هماهنگی بیشتر برای مقابله با تهدیدات موجود بحث و گفت‌وگو کرده‌اند.
روسیه و تاجیکستان توافق کرده‌اند که برای جلوگیری از تهدیدات تروریستی، سال آینده در نزدیکی مرز افغانستان در قالب سازمان پیمان امنیت جمعی رزمایش نظامی مشترک داشته باشند
