دعوت طالبان از رییس شورای علمای تاتارستان برای سفر به افغانستان
وزارت تحصیلات عالی طالبان از دیدار سرپرست این وزارت و سرپرست وزارت معارف طالبان با رییس شورای علمای تاتارستان خبر داده است.
ندامحمد ندیم، سرپرست وزارت تحصیلات عالی و حبیب‌الله آغا، سرپرست وزارت معارف طالبان از رییس شورای علمای تاتارستان دعوت کرده‌اند که به افغانستان زیر حاکمیت این گروه سفر کند.
وزارت تحصیلات عالی طالبان روز یک‌شنبه، ۲۰ جوزا، با نشر خبرنامه‌ای در ایکس از دیدار ندیم و حبیب‌الله آغا با رستم عبدالحی، رییس شورای علمای تاتارستان در حاشیه نشست بین‌المللی وزیران معارف و تحصیلات عالی که در شهر کازان روسیه برگزار می‌شود، خبر داده است.
ندیم در این دیدار گفت افغانستان اکنون در امنیت است و طالبان در برابر مردم از شفقت و مهربانی کار می‌گیرند.
گفتنی است که ندامحمد ندیم و حبیب‌الله آغا روز گذشته به منظور اشتراک در نشست بین‌المللی وزیران معارف و تحصیلات عالی در شهر کازان، عازم روسیه شدند.
