طالبان اظهارات رئیس جمهور تاجیکستان در مورد افزایش قاچاق مواد مخدر را رد کرد

ذبیح‌الله مجاهد، سخنگوی طالبان، گفته‌های رئیس جمهور تاجیکستان در باره‌ افزایش قاچاق مواد مخدر به دیگر کشورها را رد می‌کند و می‌گوید که پس از روی‌کارآمدن طالبان، جلو هر گونه کشت‌ تریاک و قاچاق مواد مخدر به بیرون از افغانستان گرفته شده است.

ذبیح‌الله مجاهد می‌افزاید: «وضعیت مواد مخدر در افغانستان کاملا تغییر کرده، انتقالات و قاچاق هم کاهش یافته است. ما بارها گفتیم، باز هم تأکید می‌کنیم که افغانستان دیگر جای تولید، قاچاق و دادوگرفت مواد مخدر نخواهد بود؛ ولی این مبارزه به وقت هم نیاز دارد، به امکانات هم که ما آهسته‌آهسته به مراحل تکمیلی آن می‌رسیم.»

امامعلی رحمان، رئیس جمهور تاجیکستان، روز چهارشنبه، ۲۹ سنبله، در سخنرانی‌اش در هفتادوهشتمین مجمع عمومی سازمان ملل متحد گفت که قاچاق مواد مخدر از افغانستان افزایش یافته است و نیروهای مرزی کشورش در دو سال گذشته، بیش از ۱۰ تن مواد مخدر را در مرز با افغانستان ضبط کرده اند.

رئیس جمهور تاجیکستان گفته است: «در دو سال گذشته قاچاق مواد مخدر از قلمرو افغانستان به مراتب افزایش یافته است. در این دوره، مقامات صلاحیت‌دار تاجیکستان در مرز با این کشور بیش از ۱۰ تن مواد مخدر را مصادره کرده اند که نظر به سال‌های پیش به چندین مراتبه زیاد است.»