فرهاد سلیم، معاون وزیر خارجه تاجیکستان، روز سه‌شنبه، ۸ قوس، در سخنرانی‌اش در نشست امنیتی هرات در شهر دوشنبه، پایتخت تاجیکستان، از افزایش فعالیت‌های تروریستی در افغانستان ابراز نگرانی کرده است.

سلیم گفت: «ما نگران افزایش فعالیت سازمان‌های تروریستی در افغانستان هستیم.»

معاون وزیر خارجه تاجیکستان همچنان خاطرنشان کرد کشورش نقض حقوق زنان و ملیت‌های ساکن در افغانستان را محکوم می‌کند.

این مقام دولتی تاجیکستان بر تشکیل نظام سیاسی فراگیر در افغانستان برای پایان دادن به منازعه دوام‌دار در این کشور تأکید کرده است.

دهمین نشست امنیتی هرات با اشتراک حدود ۲۰۰ نماینده از اروپا، آسیا و آمریکا برای اولین بار در خارج از افغانستان در حال برگزاری است.