وزارت دفاع طالبان بار دیگر به تاجیکستان و ازبیکستان هشدار داده است که چرخبال های دولت پیشین افغانستان را که در هنگام سقوط جمهوریت به این کشورها برده شده‌اند به حکومت سرپرست برگردانند. 

در حالی که ایالات متحده آمریکا اعلام کرده است که هواپیماهای نظامی جمهوریت را به حکومت طالبان نخواهد داد اما اکنون وزارت دفاع هشدار میدهد که به زودی و از هر راه ممکن این هواپیماها را بدست خواهند آورد.

عنایت الله خوارزمی، سخنگوی وزارت دفاع طالبان گفت:" این هواپیما ها سرمایه مردم افغانستان است چرخبال‌هارا باید برگردانند به وضعیت حاکم و دولت حاکم، به وزارت دفاع که مربوط وزارت دفاع می‌باشد، باید برگردانند ولی تاهنوز نداده اند البته ملاحظات خود را دارند ولی این واقعیت است که این مربوط مردم افغانستان می‌شود که در ازبیکستان و تاجیکستان است هر وقت که باشد این‌ها گرفته می‌شوند و حساب می‌شوند."

در همین حال شماری از آگاهان می گویند تا هنگامی که حکومت سرپرست به رسمیت شناخته نشود تسلیم‌دهی این چرخبال ها به کشور ناممکن خواهد بود.

به باور آگاهان کشورهای ازبیکستان و تاجیکستان به هیچ عنوان اجازه تسلیم دهی و یا تحویل دهی این هواپیما ها را به حکومت موجود یا گروه حاکم موجود ندارند."

پیش از این طالبان تایید کرده بودند که بیش از چهل چرخبال افغانستان در هنگام سقوط دولت پیشین از سوی نظامیان حکومت پیشین به تاجیکستان و ازبیکستان منتقل شده اند و از این کشورها همواره خواسته است که این چرخبال ها را به افغانستان بسپارند.