ولادیمیر پوتین، رئیس جمهور روسیه در دیدار با امامعلی رحمان، رئيس جمهور تاجیکستان، در دوشنبه گفته است که کشورش می‌خواهد همه اقوام افغانستان سهم کامل در اداره کشورشان داشته باشند.
رئيس جمهور روسیه در دیدار با همتای تاجیکستانی‌اش گفته است که مسکو در تلاش است تا با طالبان روابط برقرار کند.
پوتین گفت: «ما از هیچ تلاشی برای عادی‌کردن وضعیت در افغانستان دریغ نکرده‌ایم. ما تلاش داریم تا روابط خود را با نیروهای سیاسی که کنترل اوضاع را در افغانستان در دست دارند، تقویت کنیم.»
این در حالیست که روسیه طالبان را تاکنون از فهرست گروه‌های تروریستی خویش خارج نکرده؛ اما با آنان روابط نزدیک دارد و دیپلمات‌‌های طالبان را در مسکو پذیرفته است.
این نخستین سفر خارجی پوتین بعد از آغاز جنگ اوکراین در حالی صورت می گیرد که حکومت‌های روسیه و تاجیکستان بارها از تهدید تروریزم و بی‌ثباتی در مرزهای افغانستان ابراز نگرانی کرده‌اند. از سوی هم به‌طور مشخص تاجیکستان نگران نفوذ گروه‌های تندرو ساکن افغانستان به خاکش است.
