رسانه‌های تاجیکستان به نقل از مرکز مطبوعات نیروهای مرزبانی این کشور گزارش داده‌اند که حین درگیری میان طالبان با گروه داعش در تخار، گلوله‌هایی به‌طور تصادفی به خاک تاجیکستان اصابت کرده است.
خبرگزاری دولتی خاور تاجیکستان امروز (دوشنبه، ۱۹ ثور) در گزارشی نوشته است که طالبان و داعش دو روز قبل در امتداد مرز تاجیکستان برای یک‌ونیم ساعت درگیر شده بودند.
خاور نوشته است که از جریان این درگیری گلوله‌هایی به‌گونه تصادفی از مرز عبور کرده؛ اما  از تلفات جانی و خسارات مالی آن گزارش نشده است.
این رسانه درباره‌ی نوعیت گلوله چیزی نگفته است؛ اما ادعا شده بود که گروه داعش از خاک افغانستان علیه تاجیکستان موشک شلیک کرده است.
طبق گزارش خاور، نیروهای طالبان در حال حاضر در منطقه‌ی خواجه غار ولایت تخار برای شناسایی و خنثا‌کردن گروه‌های تروریستی اقدامات مشخصی را انجام می‌دهند.
به نقل از گزارش این رسانه، نیروهای مرزی تاجیکستان نیز در حالت آماده‌باش قرار دارند و امکانات کافی برای حفاظت از مرز را دارند.
کشورهای آسیای مرکزی از جمله تاجیکستان همواره درباره‌ی گسترش ناامنی و نفوذ داعش در شمال افغانستان ابراز نگرانی کرده‌اند.
سال گذشته در پی تسلط طالبان بر افغانستان، کشورهای آسیای مرکزی با متحدشان روسیه مانورهای نظامی در امتداد مرز افغانستان انجام دادند.