به گفته وزارت خارجه تاجیکستان رئیس جمهور این کشور امام علی رحمان از رهبران افغانستان و پاکستان دعوت نموده است در تاجیکستان جلسه کنند. دراین نشست سه جانبه روی مسایل سیاسی امنیتی و اقتصادی صحبت می‌شود.
وزارت خارجه تاجیکستان میگوید در مسایل اقتصادی روی همکاریها در بخش انرژی، ترانسپورت و تجارت میان سه کشور صحبت خواهد شد.
سعد یوسفی یک کارشناس امور سیاسی در دوشنبه گفت در این نشست بیشتر روی پروژه کاسا یک هزار صحبت خواهد شد.
وی افزود”سرعت بخشیدن به تطبیق پروژه کاسا ۱۰۰۰ یعنی یک مسئله بسیار مهم است که قرار است برعلاوه فوائد اقتصادی آن، با تطبیق و عملی شدن اش همگراهی منطقوی را در پی داشته باشد و تقویت ببخشد.”
قرار است از طریق پروژه کاسا یک هزار، ۱۳۰۰ میگاوات برق آبی از تاجیکستان و قرقیزستان به افغانستان و پاکستان منتقل شود.
بر اساس توافق انجام شده ۳۰۰ میگاوات برق در افغانستان استفاده می‌شود و ۱۰۰۰ میگاوات آن به پاکستان صادر شود که از افغانستان از درک تراتیزیت آن پول به دست خواهد آورد.
در اعلامیه وزارت خارجه تاجیکستان گفته شده که قرار است در نشست سه جانبه دوشنبه روی تلاشهای صلح حکومت افغانستان هم صحبت شده و روی این هم بحث گردد که چگونه علیه ترویستان در منطقه مبارزه شود.
رسانههای تاجیکستان از قول سرتاج عزیز مشاور صدراعظم پاکستان گزارش دادهاند که اسلام آباد تلاش دارد از طریق تاجیکستان روابطش با افغانستان را بهتر سازد.
حدود سه هفته پیش در اوج تیرهگی روابط میان افغانستان و پاکستان رئیس جمهور اشرف غنی با نواز شریف صدراعظم پاکستان در حاشیه جلسه شانگهای در قزاقستان ملاقات کرد. درین جلسه چین تعهد کرد کنفرانس سه جانبه را میان افغانستان پاکستان و چین به راه میاندازد.
دو هفته بعد از آن، وانگ یی وزیر خارجه چین سفری به افغانستان و پاکستان داشت.
انتظار میرود در پایان جلسه سه جانبه امروز در شهر دوشنبه، افغانستان، پاکستان و تاجیکستان اعلامیه مشترک را صادر کنند.
انتهای پیام/
برای اطلاع از آخرین اخبار افغانستان به کانال تلگرامی ما بپیوندید